Mi Ultimo Adios ni Gat Jose P. Rizal sa pagkaintindi ni lolo bomboy sa romblomanon ,june 2011

Mi Ultimo Adios ni Dr. Jose P. Rizal, sa pagkaintindi ni lolo bomboy sa binisaya... (romblomanon), june 2011by Lolo Bomboy on Wednesday, June 8, 2011 at 1:31pm
Mi Ultimo Adios ni Dr. Jose P. Rizal, sa pagkaintindi ni lolo bomboy sa binisaya,
07 June 2011 Tuesday at 15:03
Mi ultimo adios sa pagkaintindi ni lolo bomboy sa binisaya, june 6, 2011:

1.adios, banwang hinigugma, lugar nga ng adlaw pinalangga...,
perlas ng dagat sa oriente, ang Eden nga sa aton hay naduya...
kalipay ko itao sa imo kinabuhi kong malangkag,ni puyos hay waya,
pero bisan ina hay mas brilyante, may mas kolor, o mas fresco pa ina
ita-o ko da ina sa imo, para sa kaayuhan mo, malubong man ako sa dota

2.sa tunga ng guerra, naga bato gid ang iba nga naga deliryo,
ginata-o ang kinabuhi ning waya duda,o hadlok, para lang sa imo,
ang lugar hay indi importante, cyrpess, laurel o bisan pa ang lirio,
o bitayan o guerra o masakit nga pagka martir,o kampo abierto
ina tanan hay pareho, kung banwa kag pamilya ang yara sa peligro,

3.mapanaw ako niyan nga langit hay naga-bag-o na ning kolor,
sa katapusan hay nagabadya ang adlaw pagkatapos ng gab-ing maduyom,
kung kahinanglan mo ning semilya para magkaigwa ka ning bag-o nga buwas,
ikayat mo ang akon dugo, ibunyag mo ina sa tama nga oras,
kag taw-i ini ning silak ng imo adlaw na nagatuna pa lang magluwas..

4.mga damgo ko sadtong ako hay masyadong bata pa
mga damgo ko nang nagdako ako nga makusog na
hay adtong isa ka-adalaw makita ka pilak ng dagat oriente
uga ang imong mga itom nga mata, nakataas ang imo pis-ngi
limpio, ya dungis,ya marka ng pag-guyang o pagkahuya ini,

5.damgo ko sa kinabuhi na ini, ambisyon nga ginapangabay pa,
gani naga tawag sa imo ang akon kalag nga daw mapanaw na,
hala daw kaayo ayo gid nga madusmo ako para makalupad ka,
Mamatay ako para mabuhi ka, mamatay sa idayom ng imo langit,
kag ilubong sa dota mo para indi na gid ako makabtyag pa ning init

6.kung sa lubungan ko isa ka adlaw may makita ka nagtubo
sa tunga ng gunahon buyak nga waya da ma-i-pakadako
ilapit mo ina sa imo mga bibig kag haru-an mo adto
agud sa malamig ko nga lubungan mabatyagan ko
ang imo paghigugma kag ang baskog ng pagkabuhi mo

7.pabay-i nga iwagan ako ng bulan sang iya suave kag mahipos nga sinag,
pabay-i da nga ang bag-ong adlaw hay ipadumdum ang iya init sa akon kalag,
kag ang hangin hay pabay-i magbuyong buyong sa akon ng iya kaluyag,
kag kung igwa pispis nga dumapo kag magpahuway sa kruz ng akon lubungan,
pabay-i lang ina sya nga maghuni huni didto ng iya mga kanta ng kahimayaan

8.pabay-i nga ma-uga sa init ng adlaw ang mga labi ng uyan
kag day-on ang akon mga ginapangabay didto sa kalangitan
o nga amigo ko magtangis sa temprano ko nga katapusan
kung sa mga hapon nga mahipos, para sa akon hay may nagadasay.
ipagdasay mo da ako, banwa ko, sa Dios didto ako magpahuway

(sa gab-i nga matahum, maghambay para sa akon isa nga dasay)
(nga halin diri makadto ako sa aton Dios kag didto magpahuway)

9.magdasay para sa mga waya suerte hasta sa inda kamatayan
para sa tanan da nga mga nag-agi sa dako nga mga kasakitan
para sa mga nanay nga nagtangis sa huga ng inda ging-agihan
para sa mga viuda kag mga unga ninda nga naghirap sa presohan
kag para sa imo mismo nga maabot mo sa ulihi ang imo kaligtasan

10.kung sa gab-i hay napilibutan ng duyom ang cementeryo
kag ang mga namatay lang ang yadto naga bantay didto
pabaya-i lang ako magpahuway, pagbay-i lang ang mysteryo
tingali may mabatian isa nga malisod nga kanta ang talinga mo
o Banwa ko, ako inang nagakanta, isa nga kanta para guid sa imo

11.kag kung ang lubungan ko hay nalimutan na ng tanan
kag naduya na ang lapida o bato para ina matandaan
pabay-i ina nga bungkagon para isa ka adlaw matamnan
kag pabay-i nga ang dota dira sa akon abo hay madugangan
agud indi na ina maduya o ilupad pa kung ina hay mahanginan

12.gani waya bali nga sa ulihi ako hay malimutan na ng tanan
libuton ko ang imo kalangitan,espacio kag imo kapaligiran
makusog kag limpio nga nota imaw ina ako para sa tanan
kag kolor kag hayag, agud kanta kag panangis ko indo mabatian
naga liwat-liwat ng akon mga principio para indo pamati-an

13.banwa nga akon ginghalinan, sakit ng bu-ot gusto ko makalimutan,
ginahiguma ko nga Pilipinas, yari ulihi ko nga adios imo pamatian
dira gina bilin ko tanan, mga pinalangga, amigos, kag mga ginikanan
makadto ako didto diin tanan hay malaya, waya amo nga ginaluhuran
diin ang pananalig hay di nakakamatay, diin Dios lang ang hari ng tanan

14.adios, mga ginikanan,akon mga utod, kamo nga yara sa akon dughan,
adios sa mga tiyad naton nga nawad-an, mga amigo ng akon kabataan
magpasalamat kita nga ako hay magapahuway na niyan didto sa kalangitan
dulce amiga nga halin pa sa ibang banwa, kalipay imo ako ging taw-an
mga ginahigugma ko,adios sa tanan ,ang mamatay hay pagpahuway lang..



----------------------------------------------------
salamat kay natapos ko na da ang akon translation ng Mi Ultimo Adios...kung nagustohan nindo ini, damo nga salamat... kung indi naman, pasensya na kay imaw lang ina ang akon puede mahuman... sa imo Bot, damo guid na salamat...june 2011

Mi Ultimo Adios ni Dr. Jose P. Rizal, sa pagkaintindi ni lolo bomboy sa binisaya (romblomanon..See More

By: Dina Matoto